Gwlyptiroedd a adeiladwyd ar gyfer gwella ansawdd dŵr

Bydd angen Trwydded Amgylcheddol ar gyfer gwlyptiroedd a adeiladwyd ar gyfer trin dŵr yn bennaf er mwyn gwella ansawdd dŵr. Mae hyn er mwyn sicrhau bod y gwlyptir yn trin y llif sy’n mynd trwyddo i’r safon ofynnol i warchod yr amgylchedd.

Bydd y math o drwydded amgylcheddol y mae ei hangen arnoch yn dibynnu ar eich amgylchiadau.

Efallai y bydd angen trwydded amgylcheddol arnoch ar gyfer gollwng dŵr, neu drwydded amgylcheddol ar gyfer gwastraff a fydd yn cynnwys y gweithgaredd gollwng dŵr.

Rhagor o wybodaeth am drwyddedau ar gyfer gollyngiadau dŵr

Bydd gwlyptiroedd a adeiladwyd ar gyfer triniaeth i gyflawni niwtraliaeth o ran maethynnau hefyd yn cael eu hasesu yn unol â’n hegwyddorion niwtraliaeth o ran maethynnau.

Rhagor o wybodaeth am niwtraliaeth o ran maethynnau

Bydd unrhyw gais am drwydded yn cael ei benderfynu fesul achos yn unol â gweithdrefnau a fframwaith statudol CNC.

Fel arfer bydd gwlyptiroedd a adeiladwyd i wella ansawdd dŵr yn cynnwys un neu ragor o gelloedd yn cynnwys planhigion sy’n codi o’r dŵr sy’n briodol ar gyfer y driniaeth ofynnol. Cânt eu dylunio a’u cynnal i dderbyn a thrin dŵr / elifion / dŵr gwastraff fel na fydd unrhyw ollyngiad o’r gwlyptir a adeiladwyd yn llygru’r dŵr wyneb neu’r dŵr daear.

Ni ddylai gwlyptiroedd a adeiladwyd ar gyfer gwella ansawdd dŵr gael eu lleoli yn y canlynol:

Parth Llifogydd 3 (ardaloedd sydd mewn perygl o lifogydd cyson)
mewn parth gwarchod tarddiad dŵr (SPZ) ar gyfer cyflenwad dŵr os yw’r elifiant wedi’i drin yn cael ei ollwng i’r ddaear wedi hynny
safle sydd wedi’i ddynodi ar gyfer cadwraeth natur neu bwysigrwydd daearegol, oni bai nad oes unrhyw effaith andwyol ar nodweddion dynodedig, neu y gellir dangos bod ganddo fudd net sylweddol i nodweddion y safle fel rhan o’r anghenion rheoli cadwraeth.

Bydd angen asesiad o’r effaith ar safle dynodedig, megis yr Asesiad Rheoliadau Cynefinoedd (HRA) neu’r broses gydsynio Safle o Ddiddordeb Gwyddonol Arbennig (SoDdGA).

Gwlyptiroedd a adeiladwyd ar gyfer elifion carthion wedi’u trin

Os yw eich gwlyptir a adeiladwyd yn rhan o’r system drin, (cyn adeg monitro’r drwydded), bydd angen i chi wneud cais am Drwydded Gollwng Dŵr neu Drwydded Gweithgaredd Dŵr Daear.

Gwneud cais am Drwydded Gollwng Dŵr neu Drwydded Gweithgaredd Dŵr Daear.

Os yw eich gwlyptir a adeiladwyd wedi’i leoli ar ôl adeg monitro trwydded y gwaith trin, dylech ofyn am ein gwasanaeth cynghori cyn ymgeisio gan y bydd angen i ni ddeall mwy am eich cynnig.

Gwneud cais am ein gwasanaeth cynghori cyn ymgeisio am drwyddedau amgylcheddol

Gwlyptiroedd a adeiladwyd ar gyfer elifion carthion heb eu trin

Os yw eich gwlyptir a adeiladwyd yn derbyn elifiant carthion heb ei drin o orlif carthffos gyhoeddus a ganiateir neu fel rhan o’r system drin y cytunwyd arni, bydd angen i chi wneud cais am Drwydded Gollwng Dŵr neu Drwydded Gweithgaredd Dŵr Daear.

Gwneud cais am Drwydded Gollwng Dŵr neu Drwydded Gweithgaredd Dwr Daear

Gwlyptiroedd a adeiladwyd ar gyfer dŵr halogedig o fwyngloddiau neu weithgareddau mwynau

Os yw eich gwlyptir a adeiladwyd yn derbyn dŵr o fwyngloddiau neu weithgareddau mwynau, bydd angen i chi wneud cais am Drwydded Gollwng Dŵr neu Drwydded Gweithgaredd Dŵr Daear.

Gwneud cais am Drwydded Gollwng Dŵr neu Drwydded Gweithgaredd Dwr Daear.

Gwlyptiroedd a adeiladwyd ar gyfer elifion gwastraff wedi’i drin o weithrediad gwastraff

Os yw eich gwlyptir a adeiladwyd yn derbyn dŵr wedi’i drin o weithrediad gwastraff, bydd angen i chi wneud cais am Drwydded Amgylcheddol Gwastraff. Mae hyn yn cynnwys triniaeth drydyddol o elifion amaethyddol wedi’u trin. Byddai’r gwlyptir a adeiladwyd yn rhan o’r gweithgaredd gwastraff, wedi’i reoleiddio o dan un drwydded wastraff.

Rhagor o wybodaeth am drwyddedau gwastraff

Gwlyptiroedd a adeiladwyd ar gyfer gweithgareddau amaethyddol

Ni ellir trin elifion, hylifau a golchion a reoleiddir o dan y ddeddfwriaeth gyfredol mewn gwlyptir a adeiladwyd. Rhaid eu casglu, eu storio a’u gwaredu mewn ffordd sy’n cydymffurfio â’r gyfraith. Mae elifion, hylifau a golchion yn cynnwys ond heb fod yn gyfyngedig i’r canlynol:

elifiant silwair a slyri
ferandas unedau dofednod, iardiau casglu, mannau bwydo a golchion parlwr
plaladdwyr, bioladdwyr, gan gynnwys ardaloedd, offer a golchion sydd wedi bod mewn cysylltiad â’r cynhyrchion hyn.

Os yw eich gwlyptir a adeiladwyd yn mynd i drin dŵr glaw ffo o adeiladau sy’n gartref i dda byw gyda fentiau to a/neu draciau a ddefnyddir gan dda byw, bydd angen i chi wneud cais am drwydded.

Gwneud cais am Drwydded Gollwng Dŵr neu Drwydded Gweithgaredd Dwr Daear.

Mathau eraill o ddŵr i’w drin gan y gwlyptir a adeiladwyd

Os yw eich gwlyptir a adeiladwyd yn derbyn dŵr o ffynhonnell nad yw wedi’i chrybwyll uchod, dylech ofyn am ein gwasanaeth cynghori cyn ymgeisio oherwydd bydd angen i ni ddeall mwy am eich cynnig.